It-tilqim kontra l-ħosba lura fit-triq it-tajba
Il-ħosba hi marda virali kuntaġġuża ħafna li tista’ tittieħed fi kwalunkwe età, u li tista’ tinfirex ħafna. Hi partikolarment perikoluża għat-tfal żgħar u għan-nisa tqal mhux imlaqqmin.
It-tilqim naqqas b’mod drammatiku l-inċidenza tal-ħosba fl-Ewropa, iżda fejn it-tfal mhumiex imlaqqmin, iseħħu tifqigħat. L-eliminazzjoni tal-ħosba teħtieġ kopertura tat-tilqim ta’ aktar minn 95% b’żewġ dożi tal-vaċċin fil-gruppi kollha tal-popolazzjoni u fiż-żoni ġeografiċi kollha.
B’tilqim sikur, nistgħu nipproteġu lilna nfusna, lill-maħbubin tagħna u lil xulxin.
Tlaqqam: biex il-vaċċini jaħdmu
Żieda fil-każijiet tal-ħosba fil-pajjiżi tal-UE/ŻEE tenfasizza l-importanza ta’ programmi ta’ immunizzazzjoni tat-tfal ta’ rutina u li jingħalqu l-lakuni fl-immunità fost dawk li tilfu t-tilqim fil-passat. Għall-protezzjoni massima huma meħtieġa żewġ dożi tal-vaċċin. L-ewwel doża normalment tingħata fl-età ta' bejn 10 xhur u 18-il xahar fil-pajjiżi Ewropej. It-tieni doża tista’ tingħata xahar jew aktar wara l-ewwel doża, f’konformità mal-iskeda ta’ tilqim nazzjonali.
Mill-bidu tal-pandemija tal-COVID-19, aktar minn 1.2 miljun tifel u tifla fir-Reġjun Ewropew tad-WHO tilfu t-tilqim li jista’ jipproteġihom kontra l-ħosba, il-gattone, ir-rubella (MMR).
L-indirizzar tal-miżinformazzjoni u d-diżinformazzjoni
Il-ġenituri kollha jixtiequ l-ġid għal uliedhom, u ħafna għandhom mistoqsijiet jew tħassib dwar it-tilqim. Dan hu normali u l-pedjatriku jew il-fornitur tal-kura tas-saħħa ta’ wliedek qegħdin hemm biex jgħinu u jwieġbu kwalunkwe mistoqsija li jista’ jkollok. Billi tikseb informazzjoni minn sorsi fdati, tista’ tieħu l-aħjar deċiżjonijiet u tagħti lil uliedek bidu b’saħħtu fil-ħajja.
Ftakar: Il-vaċċin tal-ħosba ilu jintuża għal kważi 60 sena. Hu sikur u jaħdem.
